Nuwe straatkuns ‘spreek van ’n gemeenskap se trots’

Dorpsargitek Christiaan van Zyl sê dat die inisiatief om ’n kreatiewe voetoorgang te skep by die vierrigtingstop in Pêrellaan iets is om te geniet en te waardeer deur inwoners en besoekers.

Hy sê dat dit belangrik was om hierdie projek aan te pak omdat dit ’n besige kruising is. “Omrede dit by die besige kruising by Volkskool is, het dit ’n kombinasie van veiligheid, opvoeding en woordkuns geword.”

Oor die groep straatkunstenaars wat die projek suksesvol afgehandel het, sê hy: “Ons is ’n groepie energieke Oraniërs wat die dorp ’n beter plek wil maak deur openbare kuns aan te bring.”

Hy sê die inisiatief het reeds in 2019 begin. “Nikke Basson het in Julie 2019 die eerste keer ons aandag op kunstige voetoorgange gevestig met ’n paar voorbeelde van oor die wêreld. Ons het ’n pad gestap met die dorpsraad en die tegniese afdeling en uiteindelik in Junie 2020 die groen lig gekry met ’n plek om dit te verf.”

“Straatkuns spreek van ’n gemeenskap wat trots is op sy omgewing. In dié geval prikkel dit die gedagtes en behoort dit vir die jong kinders wat leer lees en skryf en wat daagliks skool toe stap, ’n opvoedkundige ondekkingstog te wees,” sê Van Zyl.

Vanaf die gemeenskap, ondersteuners van Orania en selfs uit die buiteland is baie positieweterugvoer ontvang oor die projek. “Die algemene boodskap is dat hulle trots is op ons as gemeenskap wat self opbouende en innoverende dinge in ons dorp doen. Ná vier dae is daar 84 kommentare op ’n plasing op Orania Beweging se Facebookblad wat handel oor die projek. Selfs die burgemeester is baie beïndruk met ons poging.”