Sakekamer stel G-reeks Ora’s bekend

Na afloop van die Orania Sakekamer se ledevergadering op Vrydagaand 18 September is die splinternuwe G-reeks Ora’s aan die gemeenskap bekendgestel. Daar is φ 2,6 miljoen gedruk vir die agtste reeks Ora’s.

Die nuwe reeks is deur ondervoorsitter, Conrad Basson, aan die gemeenskap bekend gestel. Hy het verduidelik dat dit ’n lang proses van konseptualisering was en het vir Cornelia Holm bedank vir haar sketse wat vertoon word op die nuwe Ora-note sowel as Karen Janse van Rensburg vir die digitalisering daarvan.

Die eerste reeks Ora’s is reeds 16 jaar gelede in Orania in gebruik geneem. Basson sê dat hulle met hierdie nuwe reeks van die ou simboliek wat op die eerste note te sien was, terug wou bring. “Hiermee  verwys ons primêr na die band wat die raampie gevorm het op die A-reeks Ora’s.”

Hy sê dat die koeksisterband wat om die rand van die note te sien is die verskillende stamlande waaruit die Afrikaners bestaan, verteenwoordig en dat die koeksister op die ou ent saam vloei om een hegte band te vorm wat die Afrikaner as hegte kern hier in Afrika uitbeeld.

Wanneer elke opeenvolgende noot onder mekaar gestapel word, word die buitelyne van die Klein Reus-simbool vertoon. “Dit simboliseer die baie belangrike eienskap van eie-arbeid in ons gemeenskap. En daarom word dit ook die grootste uitgebeeld op die nuwe reeks.”

Op die G-reeks Ora’s word die verskillende lewensfases van ’n Oraniër geillustreer sowel as die verskillende beginsels van die gemeenskap. Nog ’n spesiale eienskap van hierdie reeks is dat betrokkenes in ’n spesifieke bedryf se handtekeninge verskyn op die relevante note. “Die tekenaars is noukeurig gekies en nie lukraak ingedeel nie”

So verskyn Esna Schumann, wat betrokke is by Huppelkind Dagsorgsentrum, se handtekening byvoorbeeld op die φ 10-noot waarop die simbool van die baba-lewensfase verskyn. Hierdie simbool verteenwoordig ook die weerloses in die gemeenskap.

Op die rugkant van die note is daar ’n trossie pekanneute te sien wat spesiaal oorgeskets is vir hierdie uitgawe. “Hierdie simbool gedenk die landboupioniers wat pekanneute as volhoubare gewas geïdentifiseer het destyds in Orania,” sê Basson.

Cornelia Holm het tydens die geleentheid gesê dat dit ’n voorreg is om betrokke te wees by ’n gemeenskap wat trots is op hulle verlede. “Ons staan op die skouers van reuse en so bou ons voort op ons eie toekoms.”

Haar moeder het die oorspronklike beeld van die Klein Reus geskep. Holm het ook erkenning gegee aan Christiaan van Zyl wie se idee dit oorspronklik was om die note saam te voeg om die simbool van die Klein Reus te vorm. “Ek glo elke Oraniër sal besiel wees met trots om te handel met die note en so ’n toekoms te skep,” sê Holm.

Die Sakekamer het die gedenkstel met die nommer G00011 aan Holm oorhandig as bedanking vir haar betrokkenheid by die projek. “Die reeks is ’n absolute monument en ’n moet-hê versameling,” het Basson gesê oor die gedenkstel.

Jan Beyers het die veiling van die ander 10 gedenkstelle behartig waardeur daar R 47 250 ingesamel is. “Dié bedrag tesame met die opbrengs van advertensies wat geplaas is agterop die Ora’s gaan om die drukkoste van die nuwe reeks te dek,” sê Basson.

Jan Beyers het uittredende bestuurslede van die Sakekamer, Monja Strydom, Fanus Becker en L’lize Pienaar bedank en nuutaangestelde lede Bill Hulme, Gerhard Kotze en André Bredenkamp verwelkom.